Jubi'75

Häppi Börsdei! D’Pfadi Düdinge het i däm Jahr as grosses Jubiläum dörfe fiire. Vor 75 Jahr isch Pfadi ds Düdinge gründet cho. Zu däm Alass hi mer as chlises Geburtstagsfeschtli organisiert.

Ab de öufi het mu chöne ds Pfadihiim agugge. As paar wenigi hi di Glägehit gnützt u hi a schücha Blick i di verschidene Rümlichkite gworfe. Aber da üsers Pfadihiim mittlerwile o scho sit über 40 Jahr stiit, si di meischte äuä scho demit vertrout u hi ki Luscht ghäbe ga z gugge. Vüu lieber hi si sich a feini Bratwursch vom Grill gönnt.

Uf di zwü si de ganz vüu gwundrigi Chin cho. Denn het nämlich d’Nüüwärbig stattgfune. Während däm d’Chin di erschti Pfadiluft gschnupperet hi, hi d’Öutere ds schöna Wätter gnosse.

Am füfi isch es de mit de offizielli Geburtstagsfiir los gange. Üsi Presidäntin d’ Drago, d‘ Gminspresidäntin  Hildegard Hodel u üsa Präses de Barbudo hi üs beehrt u hi a Red uf ds Geburtstagschin ghaute. Im Aschluss het sich jeda öpis für d’Pfadi dörfe wünsche. Di Wünsch hi mer mit vüune rote u blaue Ballön i Hümu gschückt. Hoffe mer dass si sich wärde erfülle…

De Höhepunkt vo däm Fescht isch de nai ds Jubiläumsdinner gsi. Im schön dekorierte Zäut hi mer üser Gäscht mit ema 7.5–Gang-Menü verwöhnt. Agfange bim Fischallerlei ufem Gmüesbeet, über Salat, Suppa, Sorbet, isch es witer zum Houptgang mit Rindsentrecôte u Häpperegratin, gfougt vom Cheesplättli umena Moussetäller. Mmh, isch das fein gsi...